Peterson: Presion contra ABC ta pone derecho di acudi na Corte na peliger

ORANJESTAD — Presidente di Aruba Birdlife Conservation (ABC), Greg Peterson, ta bisa cu e discusion rond di e caso hudicial tocante UTV y ATV a bira mas grandi cu un conflicto entre conservacionistanan y tour operators. Asina e ta bisa den un documento publica riba su pagina di Facebook. Segun e, e tema principal ta derecho di e ciudadano y organisacion pa acudi na Corte sin wordo intimida, desacredita of pone bou presion financiero.

Den un carta publico titula “Awe ta ABC. Mañan por ta abo”, Peterson ta reacciona riba declaracionnan di  dos persona particularmente cu ta comerciantenan Jimmy Douglas y Omar-Steve Lejuez. Segun e, Douglas a cuestiona su credibilidad, mientras Lejuez a pidi patrocinadornan di ABC pa suspende nan sosten te ora e organisacion retira su proceso hudicial.

Peterson ta sostene cu ABC no ta tratando di pone su mes riba ley, sino ta pidi un huez independiente determina si Gobierno y actividadnan den area natural protegi ta cumpli cu legislacion vigente.

Segun e, esaki ta precisamente con democracia mester funciona: Parlamento ta aproba ley, Gobierno ta ehecuta nan, ciudadano por cuestiona decisionnan, y Poder Hudicial ta determina si ley a wordo respeta.

Peterson ta considera e presion financiero riba patrocinadornan particularmente preocupante  . Segun e, si un organisacion por wordo obliga pa bandona un caso pa motibo di presion economico of social, e precedente por afecta residentenan, sindicatonan, empresanan of otro organisacion cu kier cuestiona un decision di Gobierno despues.

E ta reconoce derecho di tur hende pa no ta di acuerdo cu ABC y pa manifesta contra su posicion, pero ta insisti cu mesun respet mester existi pa derecho di ABC pa acudi na Corte.

“E asunto aki ta mas grandi cu Greg Peterson. Ta mas grandi cu ABC,” Peterson ta conclui. “Awe ta ABC. Mañan por ta abo.”

Segun e, proteha derecho di acudi na Corte ta finalmente proteha democracia mes.