Aruba ta renoba cria di bestia cu 64 ejemplar nobo

ORANJESTAD — Pa di prome biaha den 14 aña, Aruba a importa un grupo nobo di bestia di cria pa fortalece y diversifica e genetica den sector local. Minister Geoffrey Wever, encarga cu Sector Primario, hunto cu Dienst Landbouw, Veeteelt en Visserij (DLVV) y Comision Pro Cunucero Arubiano (CPCA), a trece 64 bestia di rasa puro pa renoba e programa di cria na Santa Rosa.

Segun Gobierno, sector local tabatin necesidad di genetica nobo pa reduci e riesgo di cruza entre bestia cu ta famia, algo cu por afecta fertilidad, productividad y salud.

E grupo nobo ta inclui cabrito Boer y Nubian, carne Dorper y White Dorper, y porco di rasa Landrace, Yorkshire y Duroc.

Un parti di e carnenan y cabritonan lo wordo haci disponibel na prijs di cumpra pa criadornan local registra cerca DLVV. E porconan lo keda na Santa Rosa pa e programa di cria propio.

Minister Wever a bisa cu e inversion no ta solamente pa mehora e calidad di bestia, sino tambe pa fortalece produccion local di alimento y seguridad alimentario di Aruba.

Paralelamente, DLVV ta prepara un renovacion di su stalnan na Santa Rosa, cu atencion pa higiene, bioseguridad, acomodacion y cuido di bestia. Hunto cu Wageningen Universiteit, tambe ta investiga posibilidad pa un stal nobo prepara pa futuro.

Criadornan registra cu tin interes den e bestianan disponibel por comunica cu Santa Rosa na 5858102 of via info@santarosa.aw.