Jean Smart ta haci historia cu cinco Emmy consecutivo

LOS ANGELES - Actriz Mericano Jean Smart a haci historia na Emmy Awards, ganando pa di cinco biaha consecutivo un Emmy pa su papel den e serie di comedia Hacks. Cu esaki, e actriz di 75 aña ta bira e prome muher cu ta gana e premio pa tur cinco temporada consecutivo di un mesun serie.

Den Hacks, Smart ta interpreta Deborah Vance, un comediante veterano cu ta cuminsa traha cu un escritor joven. E serie di HBO a termina despues di cinco temporada. Cu su ultimo victoria, Smart awor tin ocho Emmy na su nomber.

E cantidad ey ta pone Smart hunto cu Julia Louis-Dreyfus, Cloris Leachman y awor Allison Janney entre e actrices cu mas Emmy den historia.

Tabatin mas record durante e ceremonia. Serie di comedia Widow’s Bay a gana 14 premio, superando e record anterior di 13 Emmy pa un comedia.

Actor Gales Matthew Rhys tambe a haci historia, ganando dos Emmy pa miho actor principal den un mesun aña: uno pa e miniserie The Beast In Me y otro pa Widow’s Bay. Rhys a dedica su victoria na Wales.

Drama di hospital The Pitt, cu tabatin 25 nominacion, a termina cu cinco Emmy. Noah Wyle a gana atrobe como miho actor den un serie dramatico, mientras The Pitt a gana pa di dos aña consecutivo como miho serie dramatico.

E programa cancela The Late Show di Stephen Colbert tambe a gana un Emmy. Durante su discurso, Colbert a reconoce su ex-equipo di escritores.

Emmy Awards ta considera e premionan mas importante di television Mericano.