Tour Operators Uni ta bati alarma pa posible cierre di acceso na costa Noord-Oost

ORANJESTAD – Tour Operators Uni ta expresa preocupacion serio cu e conflicto riba acceso na naturaleza di Aruba por bay mucho mas leu cu solamente clausura di e ruta California Lighthouse–Alto Vista. Segun e organisacion, e caso cu Aruba Birdlife Conservation tin contra Pais Aruba y Aruba Conservation Foundation (ACF) por eventualmente resulta den prohibicion di vehiculo di motor den diferente area protehi na costa Noord-Oost.

E caso ta programa pa wordo trata den corte dia 10 di september. Segun Tour Operators Uni, e areanan cu por wordo afecta ta inclui Duin di California y Saliña Tierra del Sol, Tera Cora y Noordoostkust, y Tres Trapi. Den e zonanan aki tin luganan popular manera Andicuri, Wariruri, Black Stone Beach, Bushiribana, Trinity Natural Bridge y parti di costa te na frontera di Parke Arikok.

E preocupacion principal di e tour operators ta cu no solamente nan actividad comercial por wordo afecta, sino tambe acceso di piscadonan, residentenan y famianan Arubano cu ta uza e zonanan aki pa recreacion.

Segun e comunicado, Aruba Birdlife Conservation ta pidi un sancion financiero di Afl. 750.000 pa dia si vehiculo di motor sigui drenta e areanan protehi. Tour Operators Uni ta adverti cu un eventual prohibicion amplio por tin consecuencia tambe pa operacion y ingreso di Parke Nacional Arikok.

Tour Operators Uni ta bisa cu e asunto a pasa di un problema sectorial pa un tema cu por afecta comunidad completo. Dia 4 di september ta programa un reunion cu Minister di Infrastructura y diferente stakeholder pa busca un solucion definitivo.