Biblioteca Nacional Aruba finalmente a haya base huridico despues di 18 aña

ORANJESTAD – Biblioteca Nacional Aruba (BNA) a wordo formalmente estableci pa medio di un Landsbesluit, poniendo fin na un proceso cu a inicia na 2008. Cu esaki, BNA finalmente ta conta cu e base huridico y organisatorio cu ta coresponde cu su funcion como biblioteca nacional di Aruba.

E paso ta yega den un aña simbolico: na 2026 BNA ta celebra 40 aña di existencia. Desde 3 di maart 1986, despues di entrada di Status Aparte, Biblioteca Publico Aruba a cambia su nomber pa Biblioteca Nacional Aruba. Sinembargo, su posicion organisatorio formal a keda pendiente te awor.

Cu aprobacion di e Landsbesluit y rapport di formacion, e situacion a wordo regularisa oficialmente. Segun Minister di Educacion Gerlien Croes, esaki ta fortalece no solamente BNA, sino tambe enseñansa, cultura y preservacion di patrimonio nacional.

Croes a señala cu, despues di 18 aña, Aruba finalmente ta completa un proceso importante pa un institucion cu durante decadanan ta sirbi comunidad. E formalizacion ta crea un fundeshi mas solido pa BNA sigui evoluciona, mientras e conserva su rol como guardian di conocemento, informacion y memoria colectivo di Aruba.

BNA ta cumpli un funcion importante den acceso publico na informacion, stimulo di lesamento, investigacion y educacion, ademas di preservacion di herencia cultural.