Aruba ta keda den tarifa mas abou di impuesto riba buelo Hulandes na 2027

ORANJESTAD – Pasaheronan cu ta bula for di Hulanda pa Aruba no lo enfrenta e aumento fuerte den impuesto riba vuelo cu lo aplica pa hopi otro destinacionnan leu for di 1 di januari 2027. Apesar cu Aruba ta situa mas cu 5.500 kilometer for di Amsterdam, e isla lo keda den e tarifa mas abou, pasobra Aruba ta forma parti di Reino Hulandes.

Actualmente, tur pasahero cu ta sali for di un aeropuerto Hulandes ta paga €30,25 na impuesto riba vuelo, sin importa distancia. For di 2027, Hulanda lo introduci tres categoria basa riba destinacion final: aproximadamente €29,40 pa distancia cortico, €47,24 pa distancia mediano y €70,86 pa distancia largo, calcula na nivel di prijs di 2025 y despues indexa pa inflacion.

Pa Aruba, esaki ta un excepcion importante. Normalmente, un buelo Amsterdam-Aruba lo cai den categoria mas caro pa motibo di distancia. Sinembargo, Gobierno Hulandes a determina cu Aruba, Corsou, Sint Maarten, Bonaire, Saba y Sint Eustatius lo keda den e tarifa mas abou debido na nan relacion constitucional cu Reino Hulandes.

E diferencia ta considerable. Un pasahero cu bula for di Amsterdam pa un destinacion leu manera Thailandia of Suriname lo paga cerca di €71 na impuesto antes di indexacion, mientras un pasahero cu Aruba como destinacion lo paga cerca di €29. Pa un famia di cuatro persona, e diferencia por pasa €160 solamente na impuesto di salida.

E medida por duna Aruba un cierto bentaha competitivo como destinacion Caribense pa mercado Hulandes. Mientras destinacionnan comparable di larga distancia lo haya un aumento considerable den impuesto, costo fiscal di un ticket pa Aruba prácticamente lo keda na nivel actual.

Importante ta cu e impuesto ta aplica solamente na pasaheronan cu ta sali for di un aeropuerto na Hulanda. E buelo di regreso for di Aruba pa Hulanda no ta cay bou di e impuesto Hulandes riba buelo.

Hulanda ta introduci e sistema nobo pa carga buelonan mas largo, cu tin mas emision, cu un impuesto mas halto. E sistema nobo ta programa pa drenta na vigor dia 1 di januari 2027.