Ronella Croes no ta pone fecha pa su salida como CEO di ATA

ORANJESTAD – Ronella Croes no ta pone un fecha riba cuanto tempo mas lo keda na cabez di Aruba Tourism Authority (ATA). Durante un entrevista cu Noticiacla, e CEO a indica cu, apesar cu e trabou ta exigente y demandante, e funcion ainda ta dun’e hopi satisfaccion y sentido di proposito.

Croes ta na cabez di ATA for di 1 di januari 2011, ora el a asumi como prome CEO di e organisacion despues di su reorganisacion como entidad independiente. Esaki ta nifica cu actualmente e tin mas di 15 aña liderando e autoridad turistico di Aruba.

Durante e entrevista, Tito Laclé a puntra Croes directamente cuanto tempo mas lo keda como CEO di ATA y si e tin un momento den mente pa termina su periodo na cabez di e organisacion. Croes a reconoce cu e pregunta no ta facil pa contesta.

“E ta un pregunta dificil. Ora bo stima bo trabou y bo tin un trabou asina diverso, cu un proposito asina grandi, esaki ta yena bo,” el a declara.

Segun Croes, e posicion ta demandante, pero e reto mes ta parti di loke ta manten’e motiva.

“E trabou ta exigente, pero e ta move mi. E ta sigui duna mi hopi placer y haci mi feliz,” el a bisa.

Croes no a indica un fecha of periodo specifico pa su salida y a laga cla cu, pa awor, e ta sigui completamente involucra den e trabou y den e retonan cu turismo di Aruba ta enfrenta.

Ora Noticiacla a puntr’e kico e ta considera un di su logro principal como CEO, Croes a menciona e periodo di pandemia y recuperacion turistico cu a sigui despues.

Segun e, un di e momentonan mas importante tabata con ATA y sector turistico a logra reacciona na e crisis y posteriormente “catalisa e recuperacion” di turismo na Aruba.

E periodo ey a representa un di e reto mas grandi pa industria turistico di Aruba, pero tambe un momento cu, segun Croes, ta marca su trayectoria na cabez di ATA.

Pa awor, despues di mas di 15 aña como CEO, Croes no ta papia di un salida. Su mensahe ta cu e trabou ainda ta dun’e energia, satisfaccion y motivacion pa sigui dilanti.