Herdé: Funcion di minister no ta simplemente temporal

ORANJESTAD – Durante programa Noticiacla LIVE, modera pa Tito Laclé, Minister René Herdé a indica cu e funcion (di minister:red) cu e ta ehecutando no mester wordo mira simplemente como algo temporal.

Durante e entrevista, Laclé a toca e tema di e posicion cu a keda habri relaciona cu De Meza y a puntra Herdé si e ta mira su rol solamente como un solucion temporal, of si e ta dispuesto pa sigui den e funcion. Herdé a bisa cu ta keda na partido kico ta pasa cu su funcion awor cu Mike de Meza a bisa cu e no kier bira minister. 

Herdé a contesta cu p’e e asunto ta “mas cu temporal”, indicando cu e ta mira su responsabilidad actual como algo cu ta bay mas leu cu solamente yena un espacio durante un periodo limita.

Den e conbersacion tambe a wordo menciona cu, den cierto circunstancianan, decisionnan por wordo tuma diferente si desde principio tabata tin mas claridad tocante e situacion y e persona cu lo ocupa e posicion.

E declaracion di Herdé ta laga habri e posibilidad cu su rol actual por tin un caracter mas duradero, aunke den e fragmento no a wordo duna un confirmacion formal tocante un nombramento permanente.