Herdé: Apunta un director nobo so no ta resolve problema na DIP y DOW

ORANJESTAD – Pakico Minister René Herdé ainda no a nombra un director nobo pa Departamento di Infrastructura y Planning (DIP) y Dienst Openbare Werken (DOW), si hustamente falta di liderazgo ta wordo menciona como un di e motibonan pa e problemanan den ambos departamento? E pregunta aki a wordo pone directamente na Herdé durante entrevista cu Tito Laclé den Noticiacla LIVE diamars anochi. Contesta  di e minister tabata cu simplemente nombra un director nobo no ta suficiente pa resolve problema cu, segun e, ta structural y a acumula durante hopi aña.

FALTA SERIO DI PERSONAL

Herdé a indica cu DIP y DOW ta enfrenta falta serio di personal, envehecemento di funcionarionan, procedimentonan bieuw y sistemanan digital cu no ta comunica bon cu otro. Segun e, un director nobo lo drenta den mesun problema si e structura bao di dje no wordo reorganisa prome.

DOW TA MENCIONA NA MITAR DI CAPACIDAD

E minister a menciona cu DOW, cu idealmente lo mester tin alrededor di 200 empleado, actualmente ta funciona cu aproximadamente mitar di e cantidad ey. Na otro departamentonan di infrastructura tambe tin falta di cuadro tecnico y personal cu experiencia.

REORGANISA PROME 

P’esey, segun Herdé, Gobierno a opta pa reorganisa e sector completo prome. Expertonan externo ta envolvi den e proceso, cu meta pa mehora procedimentonan, prepara personal, sincronisa trabou entre departamentonan y, despues, yega na liderazgo nobo. Herdé a indica cu e meta ta pa entre december y januari tin un structura mihor den luga, incluyendo proceso mas eficiente, personal mihor prepara y coordinacion mas fuerte entre DIP, DOW y otro instancia relaciona.

Su punto principal ta cu e ausencia di un director nobo no ta pasividad, sino parti di un escogencia consciente: prome coregi e sistema y despues pone liderazgo nobo na cabez di dje.

Segun Herdé, si solamente pone un director nobo riba un aparato cu ta sufri di falta di hende, procedimentonan anticuado y sistemanan cu no ta conecta, e problema fundamental lo keda mescos.