DVG ta promove doño di mascota responsabel

ORANJESTAD – Riba Dia Internacional di Cacho, Ministerio di Salubridad, Asunto Social, Cuido di Adulto Mayor y Maneho di Adiccion, hunto cu DVG, ta enfatisa importancia di cuido responsabel di mascota como parti di e campaña No Mas Sufrimento, Mas Doño di Mascota Responsabel.

E campaña ta enfoca riba bienestar di animal, prevencion di abandono y siguridad den comunidad. Un doño responsabel mester percura pa su mascota ricibi atencion veterinario, vacunacion y, ora ta necesario, castracion of sterilisacion pa evita reproduccion indesea.

Tambe ta importante pa mascota tin identificacion, preferiblemente mediante microchip registra cu informacion di contacto actualisa. Ademas, doño mester tene su mascota bou control y no bandon’e, pa evita riesgo pa otro animalnan, comunidad y medio ambiente.

Ministerio y DVG lo sigui comparti informacion y actividadnan educativo den e siguiente simannan pa reduci abandono y sufrimento di animalnan.