Wever ta pidi inversionistanan pasenshi: “Oranjestad tin atencion completo di Gobierno”

ORANJESTAD – Minister di Finanza Geoffrey Wever ta reconoce cu inversionistanan cu kier inverti den centro di Oranjestad tin motibo pa sinti frustracion cu tardanza den proceso di permiso. Sinembargo, e ta pidi nan pa no perde confiansa ni kita nan inversion for di Aruba, pasobra segun e, Gobierno ta trahando activamente pa acelera e procesonan y revitalisa centro di ciudad.Wever a haci e declaracionnan diahuebs anochi durante apertura di temporada nobo di Noticiacla LIVE, den un entrevista cu Tito Laclé.

CRITICA DI INVERSIONISTANAN

Laclé a confronta e minister cu critica di inversionistanan cu ya a expresa cu nan kier inverti, pero cu ta cansa di tarda riba permiso y otro proceso administrativo. E pregunta central tabata con Gobierno por tranquilisa nan pa no coge nan placa y bai inverti otro caminda. Wever a reconoce cu e frustracion ta real. “Nos sa cu tin casonan cu ta dura demasiado, cu e proceso ta dificil y cu esaki ta crea frustracion. Nos ta consciente cu cambio ta necesario.”\

ORANJESTAD INVESTMENT GROUP

Segun Wever, Oranjestad Investment Group a acerca Gobierno cu e peticion pa mira Gobierno den su totalidad traha pa revitalisa centro di Oranjestad. E minister ta bisa cu varios proyecto ya ta canando, incluyendo e propiedad di e gasoline station y un otro proyecto importante cu, segun e, lo wordo anuncia principio di otro siman. Wever a indica cu especialmente DIP y DOW ta bou di presion enorme. Aunque el a reconoce critica contra Minister Rene Herdé, e ta argumenta cu Herdé a hereda dos departamento cu durante hopi aña no a ricibi suficiente atencion.

HERENCIA DI HERDE 

“Minister Herdé a hereda un cartera cu durante hopi aña no a haya e atencion cu e mester. Na e momento aki e ta dunando tanto DIP como DOW e instrumentonan necesario pa nan por haci nan trabou.” Segun Wever, Gobierno ta pone fondo disponibel pa contrata mas personal y adquiri instrumentonan cu mester haci e proceso mas eficiente y mas lihe.

PROMESA NO TA SUFICIENTE PA KITA FRUSTRACION

Laclé a insisti durante e entrevista cu pa un inversionista cu ya ta expresa frustracion, promesa di mehoracion posiblemente no ta suficiente. El a puntra e minister directamente si Gobierno tin algo concreto pa evita cu inversionistanan ta perde paciencia. Wever a señala entre otro na incentivo fiscal introduci for di 1 di januari pa inversion den e dos centro di ciudad. Ademas, segun dje, Gobierno ta mantene contacto regular cu inversionistanan y ta sigui motiva nan pa tene confiansa. “Mi ta spera cu e grupo di inversionistanan por tin un poco mas di pasenshi, pasobra tur dia nos ta haci progreso pa yuda centro di ciudad bai dilanti.” E minister a menciona varios ehempel di inversion cu segun dje ta mustra cu cambio poco poco ta bira realidad. El a apunta e apertura di un pizzeria nobo, renobacion di edificionan, e proyecto di FCCA pa transforma un edificio abandona den student housing y e proyecto di Aruba Bank den centro.

COMPARA ORANJESTAD CU PIETERMAAI DI CORSOU

Durante e entrevista, Laclé a compara e potencial di Oranjestad cu Pietermaai na Corsou: un area caminda restaurant, mesa pafor, musica, decoracion y bida nocturno a transforma e centro den un area atractivo pa local y turista. “Esey ta e tipo di ambiente cu bo kier crea aki?” Laclé a puntra. Wever su contesta tabata directo: “Esey ta algo cu mi tambe kier mira na Aruba.” Ora Laclé a sigui puntra si Oranjestad un dia por realmente yega na e nivel ey, Wever a responde sin duda: “Sigur. Nos lo yega ey.” Y ora el a wordo pregunta si esaki ta su vision personal pa centro di Oranjestad, e minister a confirma: “Sí. Esey ta mi pensamiento y mi vision pa centro di Oranjestad. Nos lo yega ey.” E desafio pa Gobierno awo ta pa transforma e vision den resultado concreto y, sobre todo, haci esaki suficientemente lihe pa inversionistanan cu actualmente ta warda permiso no perde nan paciencia prome cu e revitalisacion por realmente tuma forma.