Wever: Surplus real ta 84 miyon, no 500 of 700 miyon liber pa Gobierno gasta

ORANJESTAD – Mientras oposicion y demas criticonan ta papia di un surplus di 500 y hasta 700 miyon florin cu Gobierno supuestamente por usa pa e.o. drecha caminda, baha costo di gasolin  of atende otro necesidadnan urgente, Minister di Finanza Geoffrey Wever a pone un otro cifra riba mesa: E surplus real pa e aña aki ta alrededor di 84 miyon florin, y hasta e suma ey Gobierno no por gasta libremente.

ACLAREACION DURANTE NOTICIACLA LIVE 

Wever a haci e aclaracion diahuebs anochi durante apertura di temporada nobo di e programa Noticiacla LIVE, den entrevista cu Tito Laclé. Laclé a confronta e minister directamente cu e contradiccion cu pueblo ta tende: si Aruba tin centenares di miyones den surplus, pakico Gobierno no usa e placa pa caminda, combustible of otro necesidad? Wever su contesta tabata cu e cifranan di 500 y 700 miyon ta wordo presenta fuera di contexto. “E manera cu Dangui Oduber ta presenta e cifranan ta completamente saca for di contexto.” Segun Wever, e cifra di aproximadamente 500 miyon, cu en realidad tabata cerca di 477 miyon florin, ta relaciona cu e situacion presupuestario cu e gabinete actual a hereda. E no tabata un suma di cash disponibel den un cuenta cu Gobierno por simplemente dicidi pa gasta. “E placa ey ya tabatin destino specifico. Dus, no tin 500 miyon florin disponibel pa drecha caminda.”

OBLIGACIONAN Y DEBE CU GOBIERNO MESTER PAGA

Wever a splica cu gran parti di e suma tabata destina pa obligacionnan y debenan cu Gobierno mester paga. E otro 200 miyon cu actualmente ta wordo agrega pa yega na e cifra di 700 miyon, segun e minister, ta inclui fondo di sector colectivo manera SVb y AZV. “E placa ey por ta den cuenta, pero e no ta placa cu Gobierno por saca y usa pa gasto general. E ta placa di fondo social, destina pa nos aseguradonan.”

E SURPLUS REAL: 84 MIYON

Segun Wever, e cifra relevante pa e surplus actual di Gobierno ta aproximadamente 84 miyon florin, equivalente na 1% di Producto Interno Bruto di Aruba, calcula riba un GDP di alrededor di 8.4 biyon florin. Pero tampoco ta asina cu e 84 miyon aki ta placa liber. Wever a splica cu bou di e ley cu ta duna College Aruba Financieel Toezicht CAFt) e autoridad pa traha, esta e Landsverordening Aruba Financieel Toezicht (LAFT), Gobierno ta obliga pa presenta un presupuesto cu un surplus minimo y usa e resultado positivo pa baha debe nacional. “E 84 miyon florin ey no ta placa liber cu Gobierno por simplemente gasta; ley ta determina con e mester wordo usa.”

CUANTO GOBIERNO POR USA DI E SURPLUS PA OTRO COS?

Laclé a sigui e pregunta te na su esencia: Cuanto di e surplus ta realmente disponibel pa Gobierno usa? E contesta di Wever tabata cla: “Actualmente no tin surplus liber pa gasta.” Segun e minister, e 84 miyon si ta existi como surplus, pero Gobierno tin obligacion legal pa usa e suma pa, entre otro, paga prestamo bancario y reduci deuda publico.

HOFA POR CAMBIA E REGLA

Wever a indica cu precisamente esaki ta un di e argumentonan pa cambia for di LAFT pa HOFA. Segun e, LAFT ta demasiado rigido pasobra aunke Gobierno por logra un resultado financiero positivo, ley no ta permiti gobierno pa  usa e surplus libremente pa prioridadnan nacional. Bou di HOFA, e calculacion lo cambia pa un “saldo primario”, cu ta midi e diferencia entre entrada y gasto sin inclui interes. E norma lo ta alrededor di 3.5% di GDP, segun Wever, y esaki lo por crea mas espacio financiero pa Gobierno. “HOFA lo duna Gobierno mas flexibilidad y mas espacio pa usa recurso pa necesidadnan di pais.” e mandatario a finalisa bisando.