Corte: Chauffeur cu a dal dos peaton mata, ta keda deteni

ORANJESTAD – Hues Comisario a dicidi diahuebs cu Fernandes Pedra, sospechoso den e accidente fatal cu a cobra bida di dos persona, no por wordo laga liber na e momento aki. E la bisa esaki durante e ultimo tratamento 'pro forma' di e caso imporrtante aki. E caso mes lo continua dia 2 di october 2026 pa 9:00 di mainta. Durante tratamento di e caso a resulta cu Fernandes Pedra ainda no tin asistencia efectivo di un abogado. Segun loke el a declara, abogado Moscovicz a yud’e prepara un carta, pero no ta represent’e actualmente den e proceso.

Fiscal a informa cu a haci esfuerso pa haya asistencia huridico, pero cu ningun abogado na Aruba a mustra disponibilidad pa tuma e caso. Sinembargo, tin dos abogado di Corsou cu ta dispuesto pa haci esaki.

Hues a considera presencia di un abogado esencial y a dicidi cu Fernandes Pedra mester scoge entre e dos abogadonan di Corsou. Basando riba articulo 69 di Landsverordening Strafvordering, Gobierno di Aruba mester cubri e gastonan necesario, incluyendo honorario y estadia.

Fiscal a mantene su posicion cu sospechoso no mester wordo laga liber. Ministerio Publico a señala cu un investigacion for di Hulanda riba computer di e Jeep ta indica un manera di stuur “sumamente peligroso”, cu segun Fiscal a resulta den morto di dos persona.

Defensa, pa otro banda, a reclama cu Fernandes Pedra ya a pasa 11 dia deteni na warda di Polis, mientras cu investigacion tecnico ainda no tabata completamente cla. Entre otro, a pidi mas investigacion riba comportamento di e peatonnan, si nan tabata bou influencia di alcohol, daño na e Jeep y un reconstruccion di loke a sosode.

Tambe a cuestiona si e investigacion haci na Hulanda por wordo usa como prueba y a argumenta cu Fernandes Pedra no por a mira e peatonnan. Ademas, defensa a pidi pa scucha diferente testigo.

Fiscal a contesta cu no ta necesario pa bolbe interoga e testigonan, ya cu tur imagen di camara di seguridad relaciona cu e accidente a wordo agrega na e expediente. Tambe a indica cu investigacion adicional riba computer di e auto y reconstruccion di e accidente ta den fase final.

Segun informacion presenta durante e audiencia, e victima- y testigonan ta sigui tratamento. Un psicologo a indica cu bolbe scucha nan como testigo por representa un riesgo pa nan bienestar emocional. Hues, sinembargo, a considera cu por ta suficiente pa scucha eventual testigonan dilanti di Hues Comisario.