Criminologo Henk Ferwerda ta train polisnan riba criminalidad hubenil na Aruba

ORANJESTAD – Criminologo Dr. Henk Ferwerda a duna agentenan di Cuerpo Policial Aruba (KPA) un curso intensivo di dos dia tocante criminalidad entre hobennan, basa riba su estudio “De Schaduwkant van Aruba”. E training a tuma luga riba invitacion di Korpschef Ramon Arnhem.

Durante e curso, polisnan a ricibi training pa reconoce y compronde señalnan di criminalidad hubenil y con pa actua eficientemente ora nan confronta e problematica.

Un conclusion importante ta cu criminalidad hubenil na Aruba no ta solamente un problema di Polis, sino un problema social mas amplio. Factornan manera vulnerabilidad, falta di oportunidad, ambiente social y criminalidad ta conecta cu otro. Segun e enfoque presenta, solamente represion no ta suficiente, pero prevencion sin normanan cla tampoco ta funciona.