Pieters(PPA): “Awe tur ta felicita Mike de Meza, pero unda nan tabata antes?”

ORANJESTAD – Lider di fraccion di PPA, Eduard Pieters, a felicita parlamentario Mike de Meza despues di e desenlace favorable di su caso, pero alabes a cuestiona e sosten politico cu De Meza a haya durante e periodo di incertidumbre.

Pieters a indica cu e caso mester sirbi como enseñansa pa politica Arubano. Segun dje, un politico cu haci algo malo mester carga consecuencia, pero tampoco ta aceptabel cu acusacionnan por destrui reputacion y carera durante añanan sin un desenlace cla.

El a bolbe referi na un cambio proponi den ley LIM, cu segun dje lo por duna mas proteccion contra persecucion prolonga sin base fuerte, sin elimina responsabilidad legal di politico.

Pieters a dirigi su critica principalmente na AVP y a cuestiona unda liderazgo di partido tabata durante e momentonan mas dificil pa De Meza. Segun dje, ta facil pa awor felicita y celebra, pero lealtad politico ta wordo midi precisamente ora un colega ta bou di presion.

El a critica tambe cu mayoria di coalicion AVP-FUTURO no a sostene e cambio di ley proponi anteriormente pa De Meza, y a bisa cu e desenlace actual ta duna motivo pa Parlamento reconsidera e discusion.

A pesar di su critica, Pieters a expresa respet personal pa De Meza y a finalisa cu e mensahe: “Mike, you did it. Pabien y exito.”