Destaho publico pa transforma ex-Esso Lagoen den boutique restaurant

ORANJESTAD – Minister di Finansa, Asunto Economico y Sector Primario, Geoffrey Wever, a anuncia un destaho publico pa desaroyo di e edificio di ex-Esso Lagoen den centro di Oranjestad como un boutique restaurant.

E proyecto ta forma parti di e plan di Gobierno pa revitalisa centro di ciudad y duna propiedadnan cu pa hopi tempo tabata sin uso un funcion economico nobo. Gobierno ta busca un partner cu tin experiencia y vision pa transforma e antiguo stacion di gasolin den un establecimiento cu por contribui na actividad economico y atractivo di Oranjestad.

Segun Wever, intencion ta pa combina conservacion di patrimonio cu inversion y desaroyo economico. E proyecto ta sigui otro iniciativanan den centro, incluyendo embeyecemento di Plaza Comercio na Columbusstraat y restauracion di Cas Veneranda.

Den evaluacion di e ofertanan, Gobierno lo considera entre otro calidad di e proyecto, integracion cu centro di Oranjestad, impacto economico, sostenibilidad y e principio di “Build with Nature”, cu ta busca un balans entre desaroyo economico y proteccion di medio ambiente.

Gobierno ta invita partidonan interesa cu cumpli cu e criterianan pa participa den e destaho publico, cu segun Gobierno lo tuma lugar bou di principionan di transparencia, competencia husto y igualdad di oportunidad.