ATA y UA ta uni forsa pa desaroya programa di Small Island Studies

ORANJESTAD – Aruba Tourism Authority (ATA) y Universidad di Aruba (UA) a firma un acuerdo strategico pa fortalece educacion, investigacion y desaroyo sostenibel, cu enfasis special riba un programa multidisciplinario di Small Island Studies.

E acuerdo, firma diahuebs 13 di augustus pa CEO di ATA Ronella Croes y President Curator di UA Juri Nicolaas, lo permiti Universidad di Aruba desaroya curso y certificacionnan enfoca riba e oportunidadnan y retonan specifico cu islanan chikito manera Aruba ta enfrenta.

E programa, bou di Center for Lifelong Learning (CLL), lo trata temanan manera innovacion, emprendemento, resiliencia, transformacion digital y bon gobernacion. E meta ta combina educacion academico cu investigacion aplica y proyectonan practico relaciona directamente cu comunidad y economia di Aruba.

Ademas, e iniciativa tin como ambicion pa posiciona Aruba como un centro regional di conocemento tocante Small Island Developing States (SIDS), estimulando intercambio di experticio, investigacion y cooperacion regional.

Segun ATA, e inversion ta alinea cu su prioridad pa prepara talento local y un forsa laboral capaz di contribui na un economia di bishitante mas responsabel y sostenibel. Universidad di Aruba, na su turno, ta mira e programa como un oportunidad pa fortalece colaboracion entre academia, Gobierno, sector priva y comunidad.

Cu e acuerdo, ambos organisacion ta busca inverti den conocemento y talento local y prepara un generacion nobo di profesionalnan y lidernan pa e retonan futuro di Aruba.