Gobierno ta recurri na Huez pa forza investigacion di posible iregularidad na RDA

ORANJESTAD – Gobierno di Aruba diabierna a anuncia cu nan a tuma un paso adicional pa logra cu indicacionnan di posible iregularidad na RDA wordo investiga. Despues cu Ministerio Publico a informa cu e no lo inicia un investigacion, entre otro debi na limitacion di capacidad, Gobierno a recurri na Huez cu peticion pa ordena cu e caso sigui wordo investiga.

Minister di Husticia Arthur Dowers diabierna a confirma cu Gobierno inicialmente a presenta un denuncia formal na Ministerio Publico despues di ricibi informacion tocante posible iregularidadnan na RDA. Ministerio Publico a evalua e denuncia, pero posteriormente a comunica cu e caso no lo sigui cu un investigacion.

Segun Dowers, e decision ey ta responsabilidad exclusivo di Ministerio Publico. Sinembargo, ley ta ofrece e persona of instancia cu presenta un denuncia e posibilidad di recurri contra un decision asina y solicita intervencion di Huez.

Gobierno a haci uso di precisamente e recurso legal ey. Awor ta Huez cu mester determina si Ministerio Publico mester wordo instrui pa inicia of sigui cu un investigacion tocante e posible iregularidadnan na RDA.

Dowers a indica cu e ta lamentabel cu falta di capacidad por resulta den un caso no wordo investiga, especialmente ora tin necesidad pa trece claridad tocante indicacionnan di posible iregularidad.

Gobierno ta bisa cu e ta respeta independencia di Ministerio Publico y poder hudicial, pero den e caso aki no a conforma cu decision pa no investiga y a busca intervencion di Huez pa trata di logra cu e investigacion toch tuma luga.