Encuesta Noticiacla: Costo di bida ta e preocupacion mas grandi

ORANJESTAD – Costo di bida ta claramente e problema cu mas ta preocupa participantenan den e encuesta politico di Noticiacla. Di 411 persona cu a contesta e pregunta tocante problema principal di Aruba, 208, of 50,6%, a indica costo di bida. Ningun otro problema a yega cerca di e nivel ey.

Pero ora nos separa e resultadonan segun edad, e preocupacion ta bira ainda mas evidente den grupo di 45 te 54 aña. Den e grupo aki, 55 di 83 persona cu a contesta e pregunta, of 66,3%, a indica costo di bida como problema mas grandi di Aruba.

E ta un diferencia considerable cu grupo 55–64 aña, unda 48,1% a indica costo di bida, y esnan di 65 aña of mas, unda e porcentaje ta 43%. Entre 35–44 aña, costo di bida tambe ta domina cu 56,5%, pero e grupo aki ta consisti di solamente 23 respondente.

E resultadonan pa personanan entre 18 y 34 aña no ta suficientemente grandi pa saca conclusion confiabel. Solamente dos persona den grupo 18–24 y ocho den grupo 25–34 a participa.

Ora nos mira Aruba pa districto, Paradera ta registra e porcentaje mas halto, cu 43 di 78 respondente, of 55,1%, cu ta identifica costo di bida como problema principal. Santa Cruz ta sigui cu 53,9%, y San Nicolas cu 53,1%.

Na Noord, 47,6% a identifica costo di bida como problema principal, Oranjestad 47% y Savaneta 46,2%.

E cifranan ta sugeri cu preocupacion tocante costo di bida no ta concentra solamente den un parti di Aruba. E ta aparece como un problema nacional, pero ta especialmente fuerte entre personanan den fase di edad 45–54 aña y entre habitantenan di Paradera, Santa Cruz y San Nicolas.

E grupo 45–54 ta particularmente interesante, pasobra generalmente ta trata di personanan cu tin gasto di cas, famia, transporte, seguro y otro obligacionnan mensual importante. E encuesta no ta permiti conclui dicon precisamente e grupo aki ta sinti e presion mas fuerte, pero e diferencia cu otro grupo di edad ta suficientemente grandi pa merece atencion.

Costo di bida tampoco ta aparece solamente ora pueblo ta wordo puntra pa identifica un problema. Den otro pregunta di e encuesta tocante prioridadnan pa Gobierno, e tema tambe ta sobresali, reforzando e impresion cu poder di compra y costo di bida ta uno di e principal presionnan social cu Aruba ta enfrenta actualmente.