St. Maarten kier futuro di Reino como tema central di IPKO 2027

PHILLIPSBURG - Parlamento di St. Maarten kier cu futuro di Reino Hulandes bira tema central di IPKO 2027, cu lo tuma luga di 13 pa 15 di januari na St. Maarten. E propuesta ta enfoca riba con e relacion entre e cuater paisnan den Reino mester evoluciona, teniendo cuenta cu pasado colonial, desbalansa di poder y e deficit democratico existente.

St. Maarten kier conecta e debate cu e Conferencia di Reino cu ta contempla pa final di 2026. Meta ta pa parlamentonan reflexiona riba origen di Reino, historia di esclavitud y e forma cu relacionnan colonial historico ainda ta influencia toma di decision entre e paisnan.

E intencion ta pa yega na un vision comparti pa futuro di Reino, mientras tambe lo discuti retonan financiero y falta di capital humano. Prome cu IPKO, Aruba, Curaçao y St. Maarten lo reuni den formato tripartito pa coordina temanan di interes comun.