Polis ta confisca gran cantidad di droga y placa; dos homber deteni

ORANJESTAD – Unit Narcotica di Cuerpo Policial di Aruba a haci otro detencion den un investigacion di droga cu ya a resulta den confiscacion di un cantidad grandi di marihuana y cocaina, como tambe un suma considerable di placa.

E investigacion a cuminsa diaranson 5 di augustus, ora Unit Narcotica, den colaboracion cu departamento di Crimen Organisa (UGC), Guarda Costa, Team di Arresto y Unidad Canino K-9, a logra confisca un cantidad grandi di droga riba lama.

Relaciona cu e caso, e mesun anochi polis a detene E.R.G., naci na Colombia, y posteriormente a haci un entrada hudicial na un parcela na Seroe Blanco. Durante e accion, tres persona indocumenta a wordo deteni y entrega na Guarda Nos Costa.

Unit Narcotica a sigui cu e investigacion y diahuebs 13 di augustus Team di Arresto a detene R.R.A.M., naci na Aruba, na un parcela den Johan de Wittstraat.

Durante registro di e parcela, Unit Narcotica a confisca un suma considerable di placa. Polis no ta descarta mas detencion den e dianan venidero.

Cuerpo Policial ta pidi cualkier persona cu tin informacion relaciona cu e caso pa yama tipline di polis na 11141. Informacion por wordo entrega anonimamente.