Husticia ta busca strategia mas efectivo contra tendencianan nobo di criminalidad

ORANJESTAD - Autoridadnan hudicial na Aruba a analiza e cifranan y modus operandi mas reciente di criminalidad, cu meta di usa e informacion pa mehora prevencion, investigacion y coordinacion entre e diferente organisacionnan cu ta carga cu seguridad di pais.

E presentacion di Cuerpo Policial Aruba a brinda un imagen mas detaya di e situacion actual di seguridad na Minister di Husticia Arthur Dowers, Procurador General, Fiscal Mayor, Veiligheidsdienst Aruba (VDA) y mando di polis.

E beneficio principal di e intercambio ta cu diferente organonan di Husticia ta dispone di e mesun informacion tocante patronchinan criminal actual. Segun KPA, e tipo di coordinacion aki ta fundamental pa desaroya strategianan di prevencion y investigacion mas efectivo, cu meta final di aumenta seguridad y trankilidad den comunidad.