Sector comercial di Falcon a celebra posible regreso di embaracionan venezolano na Aruba

FALCON - E noticia cu Aruba ta evalua posibilidad di bolbe permiti embarcacionnan Venezolano drenta su awanan a wordo ricibi cu entusiasmo den estado Falcon, Venezuela, caminda sector comercial ta mira e posible reapertura como un oportunidad importante pa reactiva comercio y intercambio cu Aruba.

Juan Gotopo, vicepresidente di Camara di Comercio local, a indica cu auke e decision ainda ta bou evaluacion di autoridadnan Arubiano, un reapertura maritimo por duna un impulso significativo na relacion economico entre ambos banda.

Segun Gotopo, productornan Venezolano por bolbe manda producto agricola fresco pa mercado Arubiano. Na mes momento, comerciante y transportista na costa di Falcon por beneficia di mas movimiento economico.

E sector Venezolano tambe ta mira oportunidad pa turismo den direccion contrario: mas residente di Aruba por viaha pa Venezuela, entre otro pa servicio medico y otro servicio.

Si Aruba finalmente aproba e reapertura, expectativa na Falcon ta cu cargueronan cu producto agricola y alimenticio lo ta entre e prome embarcacionnan cu bolbe haci e ruta. Despues, embarcacionnan turistico por sigui y reactiva e conexion historico entre La Vela y Aruba.