Calor fuerte na Aruba: cuida nos adultonan mayor contra deshidratacion

ORANJESTAD - Cu e temperaturanan halto na Aruba, ta importante pa presta atencion extra na adultonan mayor. Segun edad ta avansa, sensacion di sed ta disminui y curpa tin mas dificultad pa regula su temperatura, aumentando e riesgo di deshidratacion sin cu e persona mes necesariamente ripara.

Pa proteha nan durante dianan calor, ta recomenda pa nan bebe awa regularmente sin spera te ora nan tin sed, y inclui cuminda cu hopi awa manera sopi, komkomber, patia, melon y papaya.

Tambe ta preferibel evita actividad bou solo entre 10:00 AM y 4:00 PM, bisti paña fresco y di color cla, uza sunblock y mantene cas bon ventila cu fan of airco.

Bon hidratacion por yuda preveni dolor di cabes, mareo, cansancio y otro complicacionnan relaciona cu calor. Durante e temporada calor aki, un tiki atencion extra por haci un gran diferencia pa nos hendenan grandi.