OM: A cera caso contra De Meza y casa despues di pago di transaccion

OM: A finalisa caso contra Mike de Meza y su esposa despues di pago di transaccion

ORANJESTAD – Ministerio Publico diaranson a anuncia oficialmente cu e caso penal contra M.E. de Meza y su esposa a wordo finalisa, despues cu ambos a acepta y paga un transaccion. Cu e pago, persecucion penal a wordo evita y e caso ta considera definitivamente conclui.

Segun OM, De Meza y su esposa tabata sospechoso di violacion di Algemene landsverordening belastingen. Segun Ministerio Publico, entre 1 di januari 2009 y 31 di december 2021, nan lo a presenta varios biaha informacion incorecto of incompleto den nan declaracionnan di belasting riba entrada.

E prome Cita cu Fiscal, conoci como TOM-zitting, a tuma lugar dia 10 di juni 2026. Durante e sesion ey, Ministerio Publico a ofrece ambos sospechoso e posibilidad di evita un proceso penal mediante pago di un suma di placa, partiendo for di e posicion cu e caso por wordo comproba.

Na e momento ey, De Meza y su esposa no a acepta e oferta. Como consecuencia, ambos a wordo cita pa comparece dilanti Corte den Prome Instancia dia 24 di augustus 2026.

Sinembargo, riba peticion di e sospechosonan, un segundo Cita cu Fiscal a tuma lugar dia 7 di augustus. Durante e encuentro aki, Ministerio Publico a fiha un suma mas abou como condicion pa evita persecucion penal. Segun e comunicado, Ministerio Publico a tene cuenta cu e circunstancianan specifico di e caso y di e personanan involucra.

E segundo oferta a wordo acepta y e pago a wordo haci dia 11 di augustus 2026.

Ministerio Publico ta indica cu, como consecuencia di e pago, e caso ta considera definitivamente conclui. Awe, 12 di augustus, Fiscal a retira e dos citacionnan pa Corte.

E comunicado ta pone formalmente un punto final na un caso cu durante largo tempo a tene atencion publico, particularmente pa motibo di e posicion politico di Mike de Meza. Cu e retiro di e citacionnan, no lo tin proceso penal dilanti Corte den e asunto aki.