Mike de Meza ta evalua si ainda e kier bira minister

ORANJESTAD – Parlamentario Mike de Meza ainda no a dicidi si e kier drenta gabinete AVP-FUTURO como minister, awor cu e asunto fiscal cu durante mas cu un aña a blokia su nombramento aparentemente ta tras di lomba. Den su prome reaccion despues di anuncio di e acuerdo cu Ministerio Publico, durante un entrevista cu 24ora.com, De Meza a indica cu e mester evalua cuidadosamente si e ainda ta de acuerdo cu direccion actual di Gobierno y si un puesto ministerial ta e mihor manera pa sirbi pais.

SITUACION POLITICO DIFERENTE 

De Meza a splica cu situacion politico awor ta diferente for di momento cu Gobierno AVP-FUTURO a wordo forma. E tempo ey, partidonan tabata discuti programa di Gobierno, prioridadnan, ministerionan y candidatonan pa minister. Awor, despues di aproximadamente un aña y mei di gobernacion, segun e, tin suficiente informacion pa evalua con Gobierno ta funcionando den practica. “Awor bo ta papia di un Gobierno cu ya tin un aña y mei. Bo tin un vision completo,” De Meza a señala. Segun e, e mester determina prudentemente si e kier drenta e “constelacion” actual y si e ta de acuerdo cu rumbo cu Gobierno tin awor.

MINISTER OF PARLAMENTARIO 

E parlamentario a enfatisa cu un persona no necesariamente mester ta minister pa contribui na bienestar di Aruba. Como parlamentario, segun e, e por sigui critico y traha den interes general. Si e conclui cu su entrada den Gobierno no ta e mihor opcion, e ta considera cu otro persona por ocupa e funcion.

De Meza tambe a referi na su experiencia anterior como minister di Finansa entre 2009 y 2017. El a recorda cu durante e periodo ey Aruba tabata confronta problema financiero serio na diferente institucion, incluyendo fondo di pension, SVB y AZV, ademas di incertidumbre rond di refineria.

Segun De Meza, gobernacion no mester ta basa solamente riba decision popular of iniciativa cu ta produci voto. E ta sostene cu un politico mester ta dispuesto pa tuma decision dificil y impopular si nan ta den interes di pais.

“Bo no ta goberna solamente pa cos bunita y fiesta,” e parlamentario a expresa, enfatizando cu responsabilidad di Gobierno tambe ta inclui decision cu por no ta agradabel pa tur hende.

FRUSTRACION CU E PROCESO

De Meza no a sconde su frustracion cu manera su caso a evoluciona. El a describi con dificil ta pa sinti cu algo no ta husto, pero simultaneamente mester respeta proceso legal.

El a usa e dicho Hulandes “Geduld is een schone zaak” – pasenchi ta un virtud – pa describi e periodo cu el a pasa.

Sinembargo, De Meza a bay mas leu y a expresa preocupacion tocante manera poder publico por wordo usa contra ciudadano. Segun e, su propio experiencia a hacie pensa especialmente riba hende cu no tin su posicion, recurso of posibilidad pa defende nan mes.

El a plantea cu si un parlamentario cu recurso y acceso por experimenta un proceso asina, e pregunta ta kico por pasa cu un ciudadano marginalisa cu tin menos posibilidad pa haci resistencia.

De Meza a bisa cu esaki ta un di e aspectonan cu mas a molestie durante e caso, alegando cu den su experiencia poder a wordo “usa, abusa y mal usa”, segun e no pa motibo politico sino personal.

SU PRIORIDAD TABATA E CASO

Durante e entrevista, De Meza tambe a indica cu durante e ultimo simannan su prioridad tabata resolve su caso, y cu otro asunto politico tabata secundario.

“You fight one battle at a time and you choose which battle you fight,” el a bisa, señalando cu hasta den gobernacion un persona mester defini prioridadnan prome cu tuma un decision.

Awor cu e caso aparentemente a yega na un final mediante e acuerdo cu Ministerio Publico, De Meza tin un otro decision dilanti dje.

E pregunta ya no ta solamente si e por bira minister.

E pregunta ta si, despues di tur loke a pasa y despues di observa Gobierno durante un aña y mei, Mike de Meza ainda kier bira minister.