Cuida Aruba ta bolbe fin di augustus pa limpiesa y prevencion

ORANJESTAD – Gobierno di Aruba lo organisa e di dos edicion di Cuida Aruba riba 28 y 29 di augustus, cu participacion di comunidad, sector priva y diferente institucion publico. E accion nacional lo concentra riba limpiesa, boluntariado y preparacion pa temporada di awacero.

Prome Minister Mike Eman a indica cu e iniciativa ta mas cu solamente un campaña di limpiesa. Meta ta fortalece responsabilidad comunitario, reduci riesgo di inundacion y preveni problema di salud manera dengue door di elimina desperdicio y obhetonan cu por retene awa.

Diabierna 28 di augustus lo concentra principalmente riba boluntariado di empresa, hotel, scol, club deportivo, scouting y organisacion social. Diasabra 29 comunidad por limpia cas, bario y otro area y haci uzo di puntanan special di coleccion.

Serlimar lo aumenta personal y bakinan, mientras DOW lo pone makinaria pisa disponibel pa limpia canal, berma y otro area. CMO, CEDE Aruba, Bureau City Inspector, Ecotech y otro partner tambe ta participa den coordinacion.

Gobierno ta pidi comunidad pa separa desperdicio prome cu hiba esaki na e puntanan di coleccion, pa facilita transporte y procesamento.

Eman a haci un apelacion na scol, empresa, fundacion, organisacion di bario y ciudadano individual pa participa, enfatizando cu Cuida Aruba mester bira un compromiso continuo y no solamente un accion di dos dia.