242 permiso pa negoshi nobo otorga na Aruba den prome mitar di 2026

ORANJESTAD – Durante e prome seis lunanan di 2026, Directie Economische Zaken, Handel en Industrie (DEZHI) a otorga 242 permiso pa establecemento di negoshi nobo na Aruba, segun cifranan publica pa Minister di Finansa, Asunto Economico y Sector Primario Geoffrey Wever.

Den e segundo kwartaal solamente, 104 permiso nobo a wordo otorga: 69 pa VBA, 18 pa eenmanszaak, 16 pa filiaal y uno pa NV. E actividadnan ta inclui, entre otro, real estate, construccion, instalacion tecnico, huurmento di auto, restaurant, comercio di alimento y paña, y e-commerce.

Entre april y juni, DEZHI a registra 753 movimiento relaciona cu permiso y cambio empresarial y 562 beschikking ministerial a wordo firma, incluyendo casonan cu ya tabata den proceso.

Segun Wever, e cifranan ta confirma cu iniciativa priva ta sigui activo den economia Arubano. E minister a enfatisa cu Gobierno su tarea ta pa facilita inversion, reduci barrera administrativo y haci e proceso pa establece negoshi mas eficiente.

Di e 242 negoshinan nobo, 12 a establece den centro di Oranjestad y San Nicolas, seis den cada centro. Gobierno ta relaciona esaki cu e incentivanan fiscal introduci na januari 2026 como parti di e esfuerzo pa revitalisa ambos centro historico.

Geograficamente, Noord/Tanki Leendert a registra e cantidad mas halto cu 78 negoshi nobo, sigui pa Oranjestad Oost cu 50, Oranjestad West cu 42, Paradera y Santa Cruz cu 25 cada uno, Savaneta cu 13, San Nicolas Zuid cu seis y San Nicolas Noord cu tres.

Despues di e record di 880 permiso pa negoshi nobo durante 2025, Gobierno ta indica cu su enfoque ta sigui riba simplificacion, digitalisacion y reduccion di barrera administrativo pa estimula un economia mas diversifica y resiliente.