Boto cu 2 persona abordo y droga intercepta

ORANJESTAD - Diaranson anochi e avion di Wardacosta a detecta un contacto sospechoso cu tabata nabegando den direccion di Aruba. Wardacosta mesora a dirigi algun unidad di Metal Shark di Wardacosta den direccion di e contacto sospechoso.

E contacto sospechoso a keda identifica como un boto cu tabata transportando bultonan cu droga abordo. Wardacosta a start cu un persecucion y durante di e persecucion a los algun tiro di advertencia den laira pa obliga e capitan di e boto stop e boto. E boto patruyeronan a intercepta e boto sospechoso y hiba e boto na e pir di Wardacosta.

Unabes cu a yega na e pier di Wardacosta e 2 sospechosonan Venezolano y e paketenan cu substancia ilegal a keda entrega na Cuerpo Policial di Aruba.

Entretanto e droga a ser destrui. E caso ta den investigacion y Cuerpo Policial di Aruba no ta descarta posibilidad pa mas detencion