CUA ta pospone encuesta interno riba HOFA

ORANJESTAD – CUA a dicidi di pospone e encuesta interno cu tabata programa entre su miembronan tocante e propuesta di HOFA, mientras ta spera mas claridad riba e negociacionnan entre Aruba y Hulanda.

E decision ta sigui despues cu Prome Minister a declara publicamente cu Aruba tin intencion di renegocia cu Hulanda, cu e meta di obtene condicionnan mihor den e propuesta di HOFA.

Segun CUA, como e negociacionnan por resulta den cambionan den e framework cu actualmente ta riba mesa, e organisacion ta considera cu no ta den interes di su miembronan pa pidi nan tuma posicion riba un documento cu posiblemente ainda lo cambia.

CUA ta indica cu su meta ta pa cada miembro tin oportunidad di revisa y evalua e version mas actual di e propuesta prome cu nan participa den un encuesta interno.

E organisacion lo sigui monitorea e desaroyonan y progreso di e negociacionnan entre Aruba y Hulanda. Durante e periodo aki, miembronan lo wordo manteni na altura via e CUA App email ora tin informacion importante nobo.

Ora tin mas claridad tocante resultado di e negociacionnan, CUA lo evalua cua paso ta mas apropia, incluyendo si ainda lo procede cu e encuesta entre su miembronan.

Cu e decision, CUA esencialmente ta pone su proceso interno na espera mientras Gobierno di Aruba ta intenta cambia e condicionnan di HOFA prome cu e propuesta wordo someti na un evaluacion definitivo di su miembronan.