Festival Un Canto na Bernadina ta celebra 15 aña cu Gala Nacional

ORANJESTAD – Festival Un Canto na Bernadina lo celebra su 15 aniversario cu un Concierto Nacional di Gala e diasabra, 8 di augustus, na Centro di Bario Brazil. E evento ta honra e legado di Bernadina Growell-Kock, Nos Mama di Cultura Aruba, y Juan “Chabaya” Padu Lampe, Nos Tata di Cultura Aruba.

E gala lo reuni 17 artista local, incluyendo seis ganador di edicionnan anterior di e festival y 11 artista invita special. Tur interpretacion lo wordo acompaña pa un orkesta bou di direccion di maestro Danny Koolman.

Segun e organizadornan, e concierto no ta solamente un evento musical, sino un homenaje nacional cu tin como meta preserva y promove e patrimonio musical y cultural di Aruba. E programa lo inclui composicionnan di Bernadina Growell-Kock y Padu Lampe, introduci cu poema cortico y complementa cu momentonan di reconocemento dedica na e dos icononan cultural.

E Concierto Nacional di Gala ta cuminsa pa 7:00 p.m., cu e portanan habri for di 6:00 p.m.. Entrada ta Afl. 25, y ticketnan ta disponibel promé y tambe na entrada e anochi di e evento.