𝗜𝗡 𝗠𝗘𝗠𝗢𝗥𝗜𝗔𝗠: 𝐇𝐈𝐆𝐈𝐍𝐈𝐎 𝐀𝐋𝐄𝐉𝐀𝐍𝐃𝐑𝐎 “𝐏𝐀𝐓𝐀𝐍” 𝐅𝐀𝐑𝐑𝐎

𝗜𝗡 𝗠𝗘𝗠𝗢𝗥𝗜𝗔𝗠: 𝐇𝐈𝐆𝐈𝐍𝐈𝐎 𝐀𝐋𝐄𝐉𝐀𝐍𝐃𝐑𝐎 “𝐏𝐀𝐓𝐀𝐍” 𝐅𝐀𝐑𝐑𝐎

11 di januari 1942 – 30 di juli 2026

Cu profundo tristeza, Departamento di Cultura Aruba a ricibi e noticia di fayecimento di Sr. Higinio Alejandro “Patan” Farro, un di e mas grandi defensornan y exponentenan di e tradicion di Caha di Orgel na Aruba.

Cu su fayecimento, Aruba ta perde un berdadero baluarte di nos patrimonio cultural, un persona cu durante decenionan a dedica su bida cu pasion, disciplina y amor profundo na preservacion, restauracion, promocion y transmision di e arte unico di Caha di Orgel. Su nomber lo keda pa semper conecta cu un tradicion musical cu forma parti inseparabel di nos identidad y nos historia como pueblo.

Desde chikito, Patan a desaroya un amor profundo pa musica. E pasion ey a guia su persona den un trayecto di educacion y dedicacion cu a converti’e den un maestro respeta, tanto den pone pieza, afina y restaura cahanan di orgel, como den preserva e sonidonan autentico cu a acompaña hopi generacion di Arubiano. Cu humildad y perseverancia, el a dedica incontabel ora pa mantene bibo un patrimonio cu ta unico den Caribe.

Ademas di su extraordinario aporte na cultura, Patan tambe a distingui su mes den deporte Arubiano. Como atleta di hisamento di peso (weightlifting), el a representa Aruba cu orguyo den competencianan regional y internacional, logrando resultadonan meritorio y poniendo Aruba den alto den e disciplina. Durante su carrera deportivo, el a establece recordnan nacional y a inspira hopi hoben deportista cu su disciplina, perseverancia y determinacion. E mes balornan ey a caracteriza tur su bida y despues a converti den e fuerza cu a impuls’e dedica su conocimiento y talento na preservacion di nos patrimonio cultural. Asina, Patan no solamente a honra Aruba den deporte, sino tambe den cultura, convirtiendose den un ehempel di servicio, compromiso y amor pa su pais.

Na varios ocasion ela ricibi un reconocimiento tanto na Aruba y for di Corsou, na 2019 y na 2024, Minister di Cultura a honra y reconoce Sr. Higinio Alejandro “Patan” Farro pa su aporte extraordinario na preservacion di e tradicion di Caha di Orgel na Aruba. E reconocemento ey a confirma e inmenso balor di su trabou y su compromiso cu nos patrimonio cultural, reconociendo un bida completo dedica na servicio di nos cultura.

Un di e simbolonan mas importante di su legado ta “El Diamante”, un caha di orgel cu tin 109 aña di historia. E instrumento historico aki ta un simbolo di constante uzo, dedicacion y amor pa nos patrimonio cultural. Patan no solamente tabata su doño, sino tambe su restaurador, mantenedor y custodio. Cu gran pasenshi, conocimiento y habilidad artesanal, el a restaura, conserva y mantene e instrumento den condicion optimo, asegurando cu su sonidonan por sigui resona y emociona tanto e generacion actual como e generacionnan cu ta bini.

Ademas di su maestria tecnico, Patan tabata un mentor silencioso. Cu su disponibilidad pa comparti conocimiento y experiencia, el a inspira hopi amante di cultura, fomentando respet y aprecio pa e tradicion di Caha di Orgel. Su legado no ta limita solamente na e instrumentonan cu el a restaura, sino tambe den e conocimiento, e balornan y e amor pa cultura cu el a transmite na otro.

Departamento di Cultura Aruba ta expresa su mas sincero condolencia na su esposa, yiunan, nietonan, demas famia, amigonan y na henter e comunidad cultural. Nos ta desea nan hopi forsa, fe y consuelo den e bunita recuerdonan cu Patan a laga atras y den e orguyo di sa cu su legado lo sigui inspira nos pueblo.

Patan, hopi biaha nos a expresa nos gratitud na bo, pero awe nos ta hacie un biaha mas. Danki pa bo amor incondicional pa nos cultura, pa bo humildad, bo dedicacion incansabel y bo aporte extraordinario na preservacion di un di e tesoronan mas special di Aruba. Cu e mes orguyo cu bo a representa Aruba den deporte, bo a dedica bo bida na preservacion y promocion di nos identidad cultural. Bo legado lo sigui biba den nos patrimonio, den nos historia y den nos curason pa semper. Bo lo keda pa semper un fuente di orguyo pa Aruba.