Studiantenan di Universidad di Aruba ta gana subsidio pa lansa prome sistema di monitoreo di coriente di costa

EAGLE BEACH – Dos studiante di Universidad di Aruba, Kieran Kelly y Stephen Richards, a ricibi un Bright Future Research Grant di AWG 20.000, financia pa Iberostar Aruba, pa lansa Aruba su prome sistema di monitoreo di coriente di costa.

E proyecto, "Coastal Current Monitoring in Aruba," lo instala un boei inteligente cu lo midi corientenan di lama rond di Aruba y comparti e datonan den tempo real via un plataforma di acceso habri. Esaki lo yena un falta importante di informacion oceanografico local.

Modelonan regional existente no ta suficientemente preciso pa un isla chikito manera Aruba. E sistema nobo lo ofrece datonan mas exacto pa investigadornan, organisacionnan ambiental, gobierno y publico.

E prome boei ta spera di wordo instala den e proximo seis lunanan, cu e meta final di crea un red di monitoreo rond di Aruba. E informacion colecta lo yuda sigui sargassum, identifica rip currents peligroso y fortalece decisionnan riba conservacion marino y maneho ambiental.

E propuesta ganador a wordo selecciona pa un panel di experto di Universidad di Aruba, Metabolic Foundation, Iberostar Aruba, Fundacion Iberostar y Wave of Change. Segun e evaluadornan, e proyecto ta un paso importante pa investigacion cientifico y pa e futuro proteccion di e ecosistema marino di Aruba.