Interes di Argentinonan pa biaha pa Aruba a triplifica

ORANJESTAD – Aruba ta consolida su posicion como un di e destinacionnan internacional cu mas crecemento entre biahero Argentino. Durante e prome seis lunanan di 2026, e interes pa biaha pa e isla a triplica compara cu mes periodo di aña pasa.

Segun dato di plataforma di biahe Despegar, Argentinonan ta amplia nan preferencianan mas leu di destinacionnan tradicional manera Brasil, Madrid y Miami. Aruba y Tokio ta destaca como e dos tendencia nobo cu mas crecemento durante e prome mitad di aña.

Den caso di Aruba, e aumento di interes ta wordo atribui principalmente na introduccion di buelonan directo for di Argentina. E conexion nobo a haci e isla mas accesibel pa biaheronan cu ta busca beach, clima tropical y vacacion all-inclusive den Caribe.

Un investigacion di medio Argentino TN riba diferente plataforma di biahe ta indica cu un pakete pa Aruba entre 1 y 10 di october 2026 ta costa desde aproximadamente US$2.965 pa persona. E prijs ta inclui buelo y estadia den un resort all-inclusive.

Cu e crecemento aki, Aruba ta posiciona su mes como un di e destinacionnan di Caribe mas busca pa Argentinonan cu kier pasa nan vacacion afo di pais.

Tokio tambe a registra un crecemento extraordinario. Consulta pa biaha pa capital di Hapon a subi cu 600%, colocando e ciudad na di nuebe posicion entre e destinacionnan internacional mas busca pa Argentinonan.

Durante e prome semester, Rio de Janeiro a keda e destino internacional mas popular, sigui pa Santiago de Chile, Miami, São Paulo y New York. Sinembargo, e crecemento lihe di Aruba ta mustra cu preferencianan di e mercado Argentino ta cambiando y cu e isla ta gana tereno como un alternativa importante den Caribe.