Video di pasahero cu ta bebe su mes alcohol riba buelo for di Aruba ta bay viral

ORANJESTAD – Un video viral di un pasahero di JetBlue cu aparentemente a sali for di Aruba pa Fort Lauderdale ta genera hopi reaccion den social media despues cu e hende muhe a mustra con el a sirbi su propio alcohol durante e buelo.

Segun e publicacion, e pasahera a trece su propio bebida alcoholico aboardo, apesar cu un tripulante di cabina a bisa cu esey no ta permiti. Den e video, e hende muhe ta mustra con e ta basha un boter chikito di alcohol den un beker cu ijs, mientras cu e  ta haci señal pa hende keda keto.

E publicacion ta indica cu, basa riba su social media, e biahe tabata inclui bishita na Baby Beach y Flamingo Beach na Aruba. Tur indicacion ta apunta cu e video a wordo graba riba vuelo JetBlue 1612 for di Aruba pa Fort Lauderdale dia 31 di juli.

E video a haya apoyo di algun amigo, pero hopi otro usuario a adverti cu e accion por resulta den investigacion di Federal Aviation Administration (FAA) y posible multa.

Segun regulacion federal di Estados Unidos, pasaheronan por trece nan propio alcohol abordo, pero nan no por bebe esey nan mes. Solamente alcohol sirbi door di e compañia aereo, of sirbi door di e tripulacion, ta permiti. E regla ta existi pa permiti e tripulacion controla cuanto alcohol un pasahero ta consumi y preveni problema di seguridad.

Violacion di e regla normalmente no ta un caso criminal, pero por resulta den multa administrativo cu por yega te mas di US$17.000 den cierto caso. Autoridadnan ainda mester comproba cu e boter tabata contene alcohol y cu e bebida realmente a wordo consumi.