CTO: Aruba den Top 10 di destinacion di crucero cu ta crece mas lihe den Caribe

ORANJESTAD – Aruba a confirma su posicion como uno di e destinacionnan di crucero cu ta crece mas rapido den Caribe. Segun dato nobo di Caribbean Tourism Organization (CTO), e isla a registra un crecemento di 12,1% den yegada di pasaheronan di crucero durante e prome tres luna di 2026.

Entre januari y maart, Aruba a ricibi 376.442 pasahero di crucero, suficiente pa coloca e isla na di shete lugar den e lista di e 10 destinacionnan cu e crecemento mas lihe den Caribe.

Ademas di e bon resultado den turismo di crucero, Aruba tambe a sobresali den turismo di estadia. Durante e prome kwartaal di 2026, e isla a ricibi 427.343 bishitante cu a keda den hotel of alohamiento, un aumento di 8,9% compara cu mes periodo di aña pasa. Esaki ta coloca Aruba entre e destinacionnan cu e mehor desempeño general den Caribe.

E informe ta mustra cu e crecemento di turismo di crucero den Caribe ta sigui supera e crecemento di turismo di estadia. Aruba ta comparti e grupo di paisnan cu ta logra crece fuertemente den tur dos segmento, hunto cu Corsou, Republica Dominicana y Dominica.

E lista ta wordo encabeza pa Islanan Virgin Mericano cu un crecemento di 68%, sigui pa Puerto Rico (51,6%) y Islanan Virgin Britanico (29,3%). Corsou a ocupa e di cinco lugar cu un crecimiento di 15,2%, mientras cu Aruba ta sigui cu 12,1%.