Gobierno na Boneiro ta den peliger: UPB ta retira sosten di MPB

KRALENDIJK – Partido Union Patriotiko Boneiriano (UPB) a anuncia oficialmente cu e no tin confianza den Movimiento Pueblo Boneiriano (MPB) y, como consecuencia, lo retira su sosten politico pa e partido den e coalicion di gobierno cu efecto inmediato.

Den un carta firma pa lider di frakshon UPB, Benito R. Dirksz, y dirigi na gezaghebber interino Jeaninne Wong Loi Sing, e partido ta indica cu no tin mas base di confianza necesario pa sigui colaborando cu MPB.

Segun e carta, e decision ta wordo tuma na nomber di e miembronan di frakshon UPB, Pablo James Kroon y Simeona Chirino-Felida. UPB ta solicita un encuentro cu e gezaghebber pa analiza e situacion politico, cual e partido ta describi como hopi lamentabel.

Cu e decision aki, e futuro di e actual coalicion di gobierno na Boneiro ta tambalea, ya cu e retiro di sosten por tin consecuencia directo pa e mayoria den Conseho Insular.