ATA: 143 mil turista den juni; turismo crucero tambe ta subi

ORANJESTAD – Aruba Tourism Authority (A.T.A.) a publica e resultado di su encuesta anual di turismo di crucero 2025, alabes cu e estadisticanan di turismo pa luna di juni 2026. E datonan ta confirma cu Aruba ta sigui un destinacion popular pa bishitantenan di crucero y stayover. Segun e encuesta, basa riba 2.414 cuestionario, 81% di e pasajeronan di crucero a indica cu presencia di Aruba den e itinerario a influencia nan decision pa reserva e crucero. Esaki ta un aumento compara cu 78% den 2024. E experiencia di e bishitantenan tambe a sigui mehora. Tur 14 aspecto evalua den e encuesta a haya un puntuacion mas halto cu na 2024, cu beach, siguridad y hospitalidad local saliendo como e puntonan mas aprecia. Bishitantenan di crucero a gasta un promedio di US$197 pa persona durante nan parada, principalmente riba excursionnan, artesania local y cuminda y bebida.

TURISMO STAYOVER DEN JUNI 2026

Durante juni 2026, Aruba a ricibi 143.343 bishitante stayover, cu un total di 912.256 nochinan di estadia y un promedio di 6,4 anochi pa bishita.

North America a sigui domina e mercado cu 73,6% di tur yegadanan, sigui pa Sur America (20,3%), Europa (3,5%) y otro regionnan (2,5%).

Merca a sigui e mercado mas grandi cu 102.224 bishitante, mientras cu Argentina a registra 11.682 bishitante, representando un aumento significativo compara cu un aña pasa. Hulanda a sigui e mercado Europeo mas importante cu 2.755 bishitante.

En cuanto edad, Generation X a representa e grupo mas grandi di bishitantenan (26,8%), sigui pa Millennials (25,4%), Generation Z (20,8%) y Baby Boomers (18,8%).