Campaña nobo kier promove doño di mascota mas responsabel

ORANJESTAD – Gobierno di Aruba ta prepara pa lansa un maneho nobo cu tin como meta mehora bienestar di animalnan y reduci e cantidad di cacho y pushi bandona riba nos isla.

Tur dia, cacho y pushi ta wordo mira riba caya buscando cuminda, awa y proteccion. Hopi di nan ta enfrenta hamber, enfermedad, accidente di trafico y maltrato. E situacion no solamente ta afecta e bienestar di e animalnan, sino tambe seguridad publico, salubridad y calidad di bida den comunidad.

Segun Gobierno, e problema ta resultado di abandono, reproduccion sin control y falta di responsabilidad di algun doño di mascota.

P'esei, Ministerio di Salud, Cuido di Adulto Mayor y Adiccion, hunto cu Directie Volksgezondheid (DVG), ta finalisando un maneho nobo cu lo enfoca riba ownership responsabel, prevencion di abandono y un miho maneho di animalnan riba caya conforme cu ley.

Durante e siguiente simannan, comunidad lo haya mas informacion riba e diferente medidanan y riba loke realmente ta nifica ser un doño di mascota responsabel.

Cu e campaña "No Mas Sufrimento, Mas Doño di Mascota Responsabel", Gobierno ta invita tur ciudadano pa contribui na un Aruba mas sigur y mas compasivo, recordando cu e solucion no ta depende solamente di ley, sino tambe di e compromiso di cada persona.

Cada acto di responsabilidad por haci un diferencia y yuda salva bida di nos animalnan.