Pakico Andruw Jones a mester warda 9 aña pa drenta Hall of Fame?

COOPERSTOWN – Ayera, e yiu di Corsou Andruw Jones oficialmente a drenta den Baseball Hall of Fame, un honor cu Noticiacla a informa caba. Pero hopi hende ta puntra: pakico e a mester warda tanto tempo y con un hugador ta logra drenta Hall of Fame?

Nomber di Jones a aparece pa prome biaha riba e lista di candidato na 2017, despues cu e la retira di baseball profesional pa e minimo cinco aña exigi. Despues di nuebe intento, finalmente el a logra supera e rekisito di 75% di voto, loke tabata necesario pa haya un puesto den Hall of Fame.

CON UN HUNGADOR TA DRENTA BASEBALL HALL OF FAME?

E proceso di seleccion ta wordo conduci pa un comision y e miembro di Baseball Writers' Association of America (BBWAA), cu ta consisti di periodistanan di baseball.

Pa un hungador califica, e mester cumpli cu varios rekisito:

Mester a hunga por lo menos 10 temporada den Major League Baseball (MLB).

Mester tabata retira di baseball pa lo menos cinco aña.

Un comision independiente mester determina cu su carera merece un lugar riba e lista di votacion.

Finalmente, e hungador mester ricibi mas di 75% di e votonan di e periodistanan cu ta participa den e eleccion.

Jones no a logra e porcentahe durante su prome ocho eleccionnan, pero na su nuebe  intento e finalmente a ricibi suficiente apoyo pa drenta den e grupo selecto di e mihor jugadornan den historia di baseball.