DIMAS: Stop riba prome permiso di trabao regular ainda ta na vigor

ORANJESTAD — Departamento di Integracion, Maneho y Admision di Stranhero (DIMAS) a enfatisa diabierna cu e stop riba prome solicitudnan di permiso di trabao regular pa stranheronan ainda ta na vigor, conforme maneho di Minister di Husticia Arthur Dowers.

E aclaracion ta bin despues cu a surgi confusion den comunidad y sector empresarial, cu a interpreta finalisacion di programa Hunto pa Progreso como un reapertura di e proceso di solicitudnan. DIMAS ta aclara cu esaki no ta e caso.

Sinembargo, tin excepcion pa cierto profesionnan, conforme e Addendum di Handboek Toelating. Esakinan ta inclui profesionalnan cu formacion superior, gerentenan di hotel, kok y personal di cushina, tecnico specialisa, profesionalnan di IT, enseñansa y salud, accountant, panadero, slager y personal pa cierto proyecto di construccion temporal.

DIMAS ta enfatisa cu e excepcionnan ta limita na profesionnan y condicionnan specifico. E hecho cu un profesion ta aparece riba e lista no ta garantisa aprobacion di permiso.

Cada solicitud mester cumpli cu e rekisitonan legal di Landsverordening toelating en uitzetting (LTU) y e proceduranan vigente.

DIMAS ta conseha empresanan pa verifica prome si e funcion ta cualifica pa excepcion y pa no basa decisionnan riba informacion no confirma. E stop lo permanece vigente te ora Gobierno anuncia oficialmente un cambio.