Mas cu 100 ton di sushi colecta den prome oranan di accion nacional

ORANJESTAD – Comunidad Arubiano a respondi cu entusiasmo na e prome edicion di Dia Nacional Ban Cuida Aruba, logrando pa colecta mas cu 100 ton di sushi den apenas algun ora despues cu e accion nacional a cuminsa diasabra mainta.

Den e prome dos ora, boluntarionan y ciudadano a colecta casi 43 ton di desperdicio. E cantidad a sigui subi rapidamente: pa 11:00 di mainta tabatin 74,04 ton, y pa 12:00 di merdia e total a alcanza 101,20 ton, ekivalente na mas cu 61 container yen di sushi.

Pa facilita e accion, Gobierno a pone container na 26 diferente punto rond Aruba. Varios di e bakinan a yena completamente den poco tempo, obligando ekiponan di limpieza pa haci nan bashi y pone nan bek rapidamente pa comunidad por sigui deposita desperdicio.

Autoridadnan a bolbe enfatisa importancia di separa sushi correctamente. Tabatin container apart pa mata y blachi, palo y palet, carton, tire, metal y material di construccion, manera tegel y beton. Desperdicio cu ta contene asbestos no tabata permiti.

Hendenan cu no por a entrega nan sushi na e puntanan temporal tambe por haci esaki na Zona di Desperdicio Barcadera, Watertoren San Nicolas of na e punto cerca di Harbor Arena, banda di ex-Bushiri Hotel.