Piscado salba despues di a cay den lama cerca di Valero

ORANJESTAD – Un accion di rescate rapido di Wardacosta y yudansa di otro piscadonan a termina cu bon resultado diasabra anochi, ora un piscado a cay for di su boto den lama cerca di Valero.

Poco despues cu solo a baha, Centro Maritimo Operacional di Wardacosta a ricibi un notificacion despues cu e homber a logra yama su señora pa bisa cu el tabata den dificultad. Mesora, autoridadnan a wordo alerta y un operacion di rescate a cuminsa.

Wardacosta a despacha un boto Metal Shark hacia e area, mientras cu un helicopter tambe a wordo activa pa yuda den e buskeda for di laira.

Ora e ekiponan a yega na e sitio, nan a topa e piscado ainda ta mantene su mes na salvo door di tene na un boei. Dos otro boto cu tabata den cercania a yuda saka e homber for di awa y hiba esaki salvo te canto.

Riba tera, miembro di Cuerpo Policial di Aruba (KPA) y personal di ambulancia a ricibi e piscado. Despues di un evaluacion medico, a confirma cu e no a sufri heridanan serio y tabata den bon estado di salud.

Durante e operacion, otro piscadonan tambe a presta asistencia door di trece e boto di e victima bek na terra.