Hospital ta averti: Sin solucion den dos siman, lista di espera lo crece

ORANJESTAD — Horacio Oduber Hospital (HOH) ta averti cu, si no yega na un solucion cu UOAZV y Minister di Salubridad dentro di dos siman, listanan di espera lo aumenta y operacionnan y tratamentonan planifica lo wordo afecta. Segun hospital, combersacionnan ta andando desde maart 2026, sin un solucion definitivo.

HOH a presenta su preocupacionnan na miembronan di Hunta di Comisario di UOAZV durante un reunion y recorido. Hospital ta señala necesidad urgente pa muda clinica di dialisis, inversion den facilidadnan y cobertura pa tratamento den camber hiperbarico.

Segun HOH, su espacio a bira dos biaha mas grandi, pero e presupuesto fiho cu e ta ricibi di UOAZV no a crece pa cubri e ampliacion. Hospital ta pidi decisionnan urgente pa evita mas consecuencia pa pashentnan.