Andruw Jones: Awe Cooperstown y Corsou ta uni pa semper’

COOPERSTOWN – Cu hopi emocion, gratitud y orguyo pa su isla natal, Andruw Jones a subi podio di National Baseball Hall of Fame pa pone punto final na un biahe cu a cuminsa den e camponan di Corsou y a caba den e lugar mas prestigioso den baseball mundial.

Pa Jones, e honor aki no ta solamente di dje. Segun e , e ta un victoria pa henter Corsou.

"No ta facil pa yega aki for di un isla chikito manera Corsou, mas cu 2.000 miya for di Cooperstown. Pero awe, Cooperstown y Corsou ta uni pa semper."

Cu e palabranan ey, Jones a marca un momento historico como e prome homber naci na Corsou cu ta drenta den Hall of Fame.

El a bisa cu hopi hende a yuda pa pon’e riba e caminda corecto y cu e isla chikito di Corsou a mustra cu grandesa no ta depende di tamaño.

"Ta un honor increibel pa bira e prome Hall of Famer di mi isla."

Jones a dedica gran parti di su discurso na e pueblo di Corsou. El a honra Hensley Meulens, e prome pelotero di Kòrsou cu a yega den Major League Baseball, bisando cu el "a habri e porta" pa hopi otro hoben sigui nan soño.

Tambe el a menciona nomber di diferente peloteronan di Corsou cu orguyo, cu despues di dje a logra yega den Grandes Ligas.

Despues Jones a papia den su idioma materno, Papiamento.

"Un isla asina chikito manera Corsou tin hopi talento. Mi ta un yiu di Corsou, naci y cria na Corsou, cu a haya e oportunidad pa yega Grandes Ligas y logra tur esaki. Mi ta masha gradici pa tur e apoyo cu mi a ricibi. Mi ta spera cu mi historia ta inspira otro hoben pa sigui nan soño. Corsou semper dilanti. Masha danki."

E momento mas emocionante di e ceremonia tabata ora Jones a papia tocante su tata, Henry Jones, cu a fayece dies aña pasa.

El a conta cu su tata a form’e no solamente como pelotero, pero tambe como persona.

"Tata, nos a logra. Mi sa cu bo ta wak mi for di ariba cu un sonrisa grandi."

Jones a recorda con su tata tabata bati bala for di un foul line pa otro pa siñ’e sigui fly balls den e biento fuerte di Kòrsou. Tur ehercicio tabatin un motibo.

"Tur cos cu mi tata a siñami tabatin un proposito," Jones a bisa.

Despues el a gradici su mama, Carmen, pa e manera cu el a cri’e.

"Bo a siñami humildad. Bo a siñami hopi les importante den bida."

Jones tambe a gradici su ruman, su yiunan, famia y amigonan, incluyendo familiarnan cu ta biba na Aruba y Venezuela.

Atlanta Braves, e organizacion cu a firm’e ora el tabatin 16 aña, a ocupa un lugar importante den su discurso.

El a gradici e scoutnan, entrenadonan, compañeronan di ekipo y henter e personal cu a traha tras di cortina pa yud'e bira e pelotero cu mundo a conoce.

Specialmente el a honra su ex-manager Bobby Cox. "El a pone un hoben di 19 aña den line-up di World Series y a kere den mi."

Jones tambe a recorda Hall of Famer Hank Aaron, kende tabata yam’e den su oficina ora e tabata pasando un momento dificil. Pero Aaron nunca tabata papia di baseball.

"Semper e tabata puntrami: 'Con ta bai cu bo famia?'"

Segun Jones, Aaron tabata sa cu e manera miho pa yuda un pelotero tabata pa kita su mente un rato for di baseball.

Ora el a papia di su carrera, Jones a laga cla cu su pasion semper tabata defensa.

"Bo por bai 0 di 4 y ainda cambia un wega door di kita un single of un extra-base hit."

Segun e ex-center fielder, e nunca a subi tereno pensando riba Hall of Fame.

"E wega ta bira hopi mas facil ora bo ta pensa den e ekipo y no den bo mes."

Na final di su discurso, Jones a mira bek riba su biahe for di Corsou te Cooperstown.

"Na tur hende cu a yuda mi den mi biahe for di Corsou pa Cooperstown, masha danki. Dios bendishona boso."

Cu su entrada den Hall of Fame, Andruw Jones no solamente a cerra un carrera extraordinario, sino tambe a habri un capitulo nobo den historia deportivo di Corsou. Un momento cu, manera e mes a bisa, ta pertenece na henter su pueblo.