UNESCO ta pone conservacion di mata di mangel na centro di futuro sostenibel di Aruba

ORANJESTAD – Cu Aruba awor oficialmente reconoci como un UNESCO Biosphere Reserve, conservacion y restauracion di matanan di mangel ta bira un prioridad importante den e vision di desaroyo sostenibel di nos isla.

Den ocasion di Dia Internacional pa Conservacion di Ecosistema di Matanan di Mangel, Directie Natuur en Milieu (DNM), UNESCO Aruba y Aruba Conservation Foundation (ACF) a enfatisa cu proteccion di e areanan natural aki ta un responsabilidad comparti di gobierno, organizacionnan y comunidad.

Segun e organisacionnan, matanan di mangel, hunto cu yerba di lama y rif di coral, ta forma tres ecosistema conecta cu ta proteha costa di Aruba contra erosion, tormenta y contaminacion, mientras cu nan ta sostene biodiversidad y yuda combati e efecto di cambio di clima.

E reconocemento di UNESCO no ta nifica cu Aruba ta bira un gran area proteha ni cu lo bin tin restriccionnan nobo. En cambio, e ta confirma cu Aruba a compromete su mes pa busca un balans entre proteccion di naturalesa, bienestar di comunidad, patrimonio cultural y desaroyo economico sostenibel.

Gobierno lo establece un comite di maneho pa prepara un plan di accion den colaboracion cu comunidad, investigadonan, sector priva y organizacionnan local.

DNM, UNESCO Aruba y ACF ta invita tur ciudadano pa conoce mas tocante e balor di matanan di mangel y contribui na proteccion di un ecosistema cu ta esencial pa futuro di Aruba.