Sospechoso di atake durante Pride na Berlin a muri den confrontacion cu polis

BERLIN – Polis Aleman a localisa y a mata e sospechoso principal di e atake durante e desfile Pride na Berlin. E homber di 21 aña, identifica como Abdul B., a muri despues cu polis a tira riba dje ora cu, segun nan, el a core riba agentenan cu un arma blanco.

E sospechoso tabata fugitivo desde diasabra anochi, ora un bestelbus blanco a dal den participante di e Pride cerca di Potsdamer Platz. Testigonan a bisa cu e vehiculo a drenta den e multitud na hopi velocidad y despues e conductor lo a ataka hende cu un machete.

Resultado di e atake tabata cu un muhe a perde su bida y 29 otro persona a resulta herida.  

Autoridadnan a localisa Abdul B. rond di 6:00 di atardi den un volkstuin na Spandau, Berlin. Segun polis, el a core riba agentenan cu un cuchiu, obligando polis pa uza arma di candela. Apesar di intento di reanimacion, e sospechoso a muri na e sitio.

Investigacion ta mustra cu Abdul B. tabata caba conoci pa polis y servicionan di seguridad. Na mei ultimo, un hues a conden'é condicionalmente pa casi dos aña pa a prepara un acto grave di violencia. Un di e condicionnan tabata cu e mester sigui un programa di deradicalisacion.

Ademas, autoridadnan ta bisa cu e sospechoso a purba biaha pa Siria pa uni cu e grupo terrorista Estado Islamico (IS). Medionan Aleman ta informa cu e tabata den bista di servicionan di seguridad desde cu e tabatin 16 aña, pa motibonan relaciona cu criminalidad serio, radicalisacion y contacto cu circulonan islamista.

Aunke e sospechoso principal a muri, polis no ta exclui cu tin mas persona envolvi den e atake. Varios sospechoso a wordo deteni y interoga, y algun di nan ta ainda bou detencion mientras e investigacion ta sigui.