Tres persona muri na Venezuela despues di contagio cu hantavirus

CARACAS – Autoridadnan di salud na Venezuela a confirma cu tres persona a muri despues di wordo contagia cu hantavirus. Te awor no tin ningun indicacion cu e virus a pasa di persona pa persona.

Ministerio di Salud no a revela den cua region di Venezuela e casonan a wordo detecta ni cua variante di hantavirus ta trata. Normalmente, e virus ta wordo transmiti pa raton, y por causa  problema serio di pulmon na hende.

Na april, un brote di e variante Andes a causa preocupacion internacional despues cu e virus a wordo detecta abordo di e crucero Hulandes m/v Hondius, unda tres persona tambe a perde nan bida. E brote ey posteriormente a wordo controla, segun Organisacion Mundial di Salud (WHO).

Te awor no tin ningun evidencia cu e tres caso fatal na Venezuela tin relacion cu e brote anterior.

ARUBA, CORSOU Y BONEIRO

Autoridadnan tampoco no a haya indicacion cu e virus a plama pa Aruba, Corsou of Boneiro, y no tin ningun advertencia oficial pa e islanan.

Personanan cu recientemente a bishita e area afecta na Venezuela y despues desaroya sintomanan manera keintura, dolor muscular, dolor di cabes, tosamento of falta di rosea, mester busca asistencia medico y informa nan historial di biahe.