Bahamas ta pasa Aruba den lucha pa turista di Canada

ORANJESTAD/NASSAU – Aruba ta enfrenta competencia mas fuerte den mercado canadiense, despues cu Bahamas a supera Aruba y otro destinacionnan di Caribe den crecemento di turismo for di Canada, segun un informe internacional publica e siman aki.

E informe ta señala cu Bahamas a logra un record di 12.5 miyon bishitante na 2025. Llegadanan for di Canada a subi cu mas di 11% durante 2025 y cu mas di 30% den e prome trimester di 2026.

Segun e analisis, e exito di Bahamas ta resultado di mas conexionnan aereo directo, inversion den turismo di luho, promocion di bishitanan cu ta keda mas tempo y un  strategia cu ta combina varios isla den un solo experiencia di vacacion.

E informe ta menciona Aruba, Barbados, Jamaica y Republica Dominicana como destinacionnan cu awor ta enfrenta mas competencia pa atrae turista canadiense. Esaki ta pone enfasis riba importancia pa Aruba sigui fortalece su conectividad aereo, mercadeo y innovacion pa mantene su posicion den un di su mercadonan internacional mas importante.