Hulanda ta pidi Aruba considera prohibicion riba productonan for di colonianan Israeli

ORANJESTAD/DEN HAAG – Gobierno Hulandes a pidi Aruba, Corsou y Sint Maarten pa considera introduci nan mes prohibicion riba importacion y benta di productonan cu ta bini for di colonianan Israeli den territorionan ocupa. Asina e portal Curacao.nu ta raporta. E prohibicion nobo di Hulanda lo drenta na vigor dia 21 di september, pero lo aplica solamente na Hulanda Europeo y Caribe Hulandes (Boneiru, Sint Eustatius y Saba).

Segun Gobierno Hulandes, e tres paisnan autonomo den Reino tin nan propio leynan pa implementa sancionnan internacional. P'esey, ta na cada gobierno pa dicidi si nan lo introduci un prohibicion similar.

E medida Hulandes ta prohibi importacion, compra, benta y intermediacion di productonan cu ta bini for di e colonianan cu Hulanda ta considera ilegal segun derecho internacional. Gobierno Hulandes a indica tambe cu e ta dispuesto pa coopera cu e paisnan si nan decidi implementa medidanan comparabel.

Te cu awor, Aruba, Corsou y Sint Maarten ainda no a anuncia si nan lo introduci un prohibicion similar.